A Rúa de Valdeorras marca un punto de especial interese no Camiño de Inverno, combinando un rico patrimonio local coa paisaxe espectacular que debuxan as Ribeiras do Sil.

Ao chegar á vila, un dos primeiros elementos que captura a atención é a Ponte da Cigarrosa, un punto histórico que serve de porta de entrada e que ofrece vistas magníficas sobre o río Sil. Un paseo polas rúas do núcleo antigo revela a arquitectura tradicional galega, con exemplos de casas señoriais e pazos que falan da historia da comarca. Non se debe deixar de visitar a Igrexa de Santo Estevo, un templo de relevancia patrimonial na propia Rúa.

Un dos restos romanos máis destacados e significativos que o peregrino ou viaxeiro pode atopar na Rúa de Valdeorras é a lápida de Lucio Pompeyo Reburro Fabro. Este monumento funerario, datado entre os séculos II e III d.C., non só recorda a un habitante romanizado da zona, senón que posúe unha inmensa importancia histórica por ser a clave que permitiu identificar o topónimo romano de Calubriga nesa rexión.

A lápida foi descuberta orixinalmente no ano 1680 nas proximidades da Cigarrosa, un punto fundamental da antiga Vía Nova (Vía XVIII) onde cruzaba o río Sil. Co obxectivo de garantir a súa conservación, a peza foi trasladada e, afortunadamente, hoxe en día permanece visible para o público e integrada no percorrido do Camiño de Inverno.

Pódese visitar no barrio de A Rúa Vella, estando enclavada e protexida por un cristal na fachada dunha das casas, moi preto da histórica Igrexa de Santo Estevo. A Lápida de Reburro é, sen dúbida, unha parada obrigada que ilustra de forma tanxible o profundo e rico legado romano da Rúa, ligada ás vías de comunicación e á explotación do ouro na Antigüidade.

Unha viaxe dende o Foro Romano ata a actualidade

Para as persoas con curiosidade, este será un percorrido a pé ante as edificacións e espazos máis relevantes para a historia, a economía e a vida cotiá da nosa comarca. O obxectivo é descubrir e comprender a evolución deste territorio dende as súas orixes, baseándonos en estudos históricos e na memoria local.

Sabías que nesta zona estivo o foro romano da comarca? O asentamento romano centrouse aquí atraído polas riquezas da zona. Todo iso en dúas horas? Intentarémolo… e do xeito máis ameno e participativo posible!

Programación e Percorrido

• 16:30 h | Saída Punto de encontro na Praza Doutor Quiroga de Petín (esquina rúa Carreira).
• Paseopolo casco hítórico de Petín ata a emblemática Ponte da Cigarrosa.
• Visita á Rúa Vella Exploración da contorna de Santo Estevo, analizando os fitos históricos que marcaron a sociedade e a economía local.
• Fin da actividade Entrega dun agasallo “souvenir” da zona para todos os participantes.

Detalles de Interese

• Duración estimada: 2 horas.
• Temática: Historia, patrimonio romano e evolución social.
• Carácter: Ruta guiada participativa e amena.